ڪنڌڪوٽ عيدگاھ محلي ۾ ارڙي جي وبا شدت اختيار ڪري وئي، ويڪسين نه هجڻ سبب معصوم ٻارڙي فوت
ڪنڌڪوٽ عيدگاھ محلي ۾ ارڙي جي وبا شدت اختيار ڪري وئي، ويڪسين نه هجڻ سبب معصوم ٻارڙي فوت
تفصيل موجب
ڪنڌڪوٽ جي عيدگاھ محلي ۾ ارڙي جي وبا تيزي سان پکڙجي وئي آهي، جتي ويڪسين جي عدم فراهمي ۽ صحت کاتي جي مبينا لاپرواهي سبب معصوم مريم ڌيءُ محمد صادق لاشاري حياتي وڃائي ويٺي.
معصوم ٻارڙي جي والد ميڊيا سان ڳالهائيندي چيو ته، ”اسان جي علائقي ۾ ڪڏهن به ويڪسين واري ٽيم نه آئي، اسان جي نياڻي تڙپي تڙپي دم ڏنو.“ هن الزام هنيو ته اي پي آء جو عملو رڳو ڪاغذن ۾ رڪارڊ ڏيکاري ٿو، پر عملي طور تي ڪا به ٽيم نه پهتي آهي.
علائقي واسين جو چوڻ آهي ته ڪيترائي ٻار ارڙي جي لپيٽ ۾ اچي چڪا آهن، پر اڃا تائين صحت کاتو يا ضلعي انتظاميا ڪا به سنجيده قدم ناهي کنيو.
شهرين صحت واري وزير، سيڪريٽري هيلٿ ۽ ڊپٽي ڪمشنر ڪشمور کان مطالبو ڪيو آهي ته واقعي جي جاچ ڪرائي ذميوارن خلاف سخت ڪارروائي ڪئي وڃي ۽ عيدگاھ محلي ۾ فوري طور تي ويڪسين ٽيم موڪلي وڃي ته جيئن وڌيڪ انساني جانين جو نقصان نه ٿئي.
